Kategori: Këshilla

Kjo është pyetja që marrim më shpesh nga ata që hapin sallon për herë të parë. Përgjigjja e sinqertë: varet nga pajisja. Disa gjëra ia vlen t’i blini të përdorura dhe të kurseni, për disa të tjera do të pendoheni. Ne shesim të dyja, prandaj nuk kemi arsye t’ju shtyjmë në njërën anë.

Ku ia vlen e përdorura

Mobiljet e rënda me pak mekanikë janë blerja më e sigurt e përdorur. Një poltron prerjeje ose një karrige berberi me bazë të rëndë dhe pompë hidraulike që punon, e pastruar dhe me lëkurë të padëmtuar, bën të njëjtën punë si një e re për një pjesë të çmimit. E njëjta gjë vlen për lavatestat me lavaman qeramike, për banakët e recepsionit, për pasqyrat me kornizë dhe për divanët e pritjes.

• Poltronë prerjeje dhe karrige berberi me pompë që mban peshën
• Lavateste me lavaman qeramike pa plasaritje
• Banakë recepsioni, komodina, karrela dhe ekspozitorë
• Divanë dhe kolltukë pritjeje me tapiceri të pastër
• Krevate estetike mekanike (jo elektrike)

Shikoni se çfarë kemi aktualisht te mobiljet e përdorura. Stoku ndryshon çdo javë, prandaj nëse diçka ju pëlqen, mos e lini për nesër.

Ku këshillojmë të renë

Gjithçka me motor, rezistencë ose elektronikë. Tharëset me kaskë, avulloret, piastrat, tharëset e dorës dhe krevatet estetike elektrike kanë jetë të kufizuar dhe nuk e dini sa janë përdorur. Një avullore e përdorur që ndalon në mes të një ngjyre ju kushton më shumë se diferenca e çmimit. Po ashtu, gjithçka që prek direkt lëkurën e klientit në trajtime estetike, si kokat e aparateve, duhet të jetë e re.

• Tharëse, piastra dhe avullore
• Krevate estetike elektrike dhe aparate depilimi
• Sterilizues dhe lampa UV
• Makina qethjeje dhe trimera

Çfarë të kontrolloni para se të blini të përdorur

Poltron ose karrige berberi

Uluni dhe ngrijeni deri në fund me pompën. Duhet të ngrihet pa zhurmë dhe të qëndrojë lart pa u ulur vetë për disa minuta. Rrotullojeni plotësisht dhe kontrolloni që baza të mos lëkundet. Shikoni lëkurën në krahë dhe në ndenjëse, aty gjenden çarjet e para.

Lavateste

Kontrolloni lavamanin për plasaritje, sidomos rreth shkarkimit. Rubineti dhe dushi ndërrohen lehtë, lavamani jo. Mbështetësja e qafës duhet të jetë e tërë, se është pjesa që klienti e ndien.

Krevat estetik

Për modelet mekanike kontrolloni mekanizmin e ngritjes së shpinës dhe këmbëve dhe stabilitetin kur dikush shtrihet. Për modelet elektrike provoni çdo motor deri në fund të lëvizjes, në të dy drejtimet.

Si i përgatisim ne mobiljet e përdorura

Çdo pjesë që marrim kontrollohet, pastrohet dhe, kur duhet, riparohet para se të dalë në shitje. Pompat që nuk mbajnë ndërrohen, lëkura e dëmtuar ritapicohet, lavamanët me plasaritje nuk shiten fare. Ju themi hapur çfarë ka dhe çfarë nuk ka një produkt, se klienti i pakënaqur na kushton më shumë se shitja.

Një kombinim që funksionon

Shumica e salloneve që hapim bëjnë kështu: poltronë, lavateste dhe mobilje pritjeje të përdorura ose një përzierje, ndërsa pajisjet elektrike të reja. Kështu buxheti shkon aty ku duhet dhe salloni duket njësoj profesional. Nëse doni të shihni se çfarë mund të kombinohet për hapësirën tuaj, na shkruani në WhatsApp dhe ju dërgojmë foto nga stoku aktual.

Një sallon berberi ka nevoja të ndryshme nga një parukeri për femra. Klientët janë më shumë dhe qëndrojnë më pak, pajisjet duhet të durojnë ngarkesë të madhe, dhe pamja e sallonit është pjesë e shërbimit. Ky udhëzues ju tregon çfarë duhet të blini dhe si ta organizoni hapësirën që puna të ecë shpejt.

Karrigia e berberit

Këtu nuk ka vend për kursim. Karrigia e berberit është e rëndë, me bazë hidraulike, me mbështetëse koke të lëvizshme dhe me shpinë që ulet për rroje. Një karrige e mirë mban çdo ditë dhjetëra klientë për vite me radhë, një e dobët fillon të lëkundet brenda muajve. Shikoni modelet te faqja e berberit, ku kemi karrige klasike me krom dhe modele moderne me lëkurë të zezë ose kafe.

• Një karrige berberi për çdo berber, me bazë të rëndë dhe pompë hidraulike
• Mbështetëse koke e lëvizshme dhe shpinë që ulet për rroje
• Karrige për fëmijë ose ndenjëse ngritëse nëse pranoni klientë të vegjël

Pasqyra dhe stacioni

Stacioni i berberit është zakonisht më i thjeshtë se ai i parukeres: një pasqyrë e madhe, një raft për makinat dhe një sipërfaqe për produktet. Pasqyrat e gjera me ndriçim LED i japin sallonit pamje profesionale dhe e bëjnë prerjen më të saktë. Nëse hapësira është e ngushtë, stacionet me mur të përbashkët kursejnë vend.

• Pasqyrë me LED ose stacion me pasqyrë dhe raft të integruar
• Mbajtëse për makinat e qethjes dhe për tharësen
• Priza të mjaftueshme: makinë, trimer, tharëse dhe sterilizues për çdo stacion

Larja

Edhe pse jo çdo klient lahet, një lavateste është e domosdoshme për prerjet me gërshërë dhe për trajtimet. Modelet për berber janë zakonisht më të ulëta dhe me lavaman më të gjerë. Për një sallon me dy tre berberë mjafton një.

Pritja

Berberitë punojnë shpesh pa rezervim, prandaj zona e pritjes është më e rëndësishme se në një parukeri. Planifikoni të paktën një vend pritjeje për çdo berber, mundësisht dy. Një divan ose dy kolltukë, një tavolinë e vogël dhe një ekspozitor me produkte për mjekrën dhe flokët plotësojnë hapësirën. Shikoni karriget dhe kolltukët dhe banakët e recepsionit.

Si ta organizoni hapësirën

Deri në 25 metra katrorë

Dy karrige berberi përgjatë një muri, pasqyrë e gjatë e përbashkët, lavateste në fund dhe tre vende pritjeje pranë hyrjes. Banaku i recepsionit mund të zëvendësohet me një komodinë të vogël.

25 deri në 40 metra katrorë

Tre ose katër karrige, lavateste e veçuar me një mur ose paravan, zonë pritjeje me divan dhe banak recepsioni me ekspozitor. Lini kalim të lirë nga hyrja te stacionet, që klientët që presin të mos jenë në rrugën e berberëve.

Mbi 40 metra katrorë

Këtu ia vlen të ndani sallonin në zona: prerje, larje, pritje dhe, nëse ofroni, një kabinë për trajtime fytyre. Për këto hapësira bëjmë aredime të plota salloni me të njëjtin stil për të gjitha mobiljet.

Aksesorët

• Mantela berberi me mbyllje në qafë, mundësisht të zeza
• Sterilizues UV për makinat dhe gërshërët
• Stol me rrota për punën në pozicion të ulur
• Kosh me kapak dhe fshesë me kapëse për çdo stacion
• Peshqirë të vegjël dhe ngrohës peshqirësh për rrojen klasike

Nëse po hapni një berberi, na dërgoni një foto ose një skicë të lokalit në WhatsApp. Ju themi sa karrige futen rehat, çfarë kemi në stok dhe sa shpejt mund ta sjellim në qytetin tuaj.

Hapja e një parukerie nis me një listë. Pa të, blerjet bëhen copa copa, gjërat nuk përputhen me njëra tjetrën dhe në fund dalin më shtrenjtë. Më poshtë gjeni gjithçka që i duhet një salloni flokësh për të filluar punën, të ndarë sipas zonave, me shënime nga përvoja jonë me sallonet në Tiranë dhe në gjithë Shqipërinë.

Zona e punës: stacioni i parukeres

Stacioni është vendi ku kalon pjesa më e madhe e ditës. Për çdo parukere ju duhet një poltron prerjeje, një pasqyrë me ndriçim dhe një sipërfaqe për veglat. Poltroni duhet të jetë hidraulik, me bazë të rëndë që nuk lëkundet, dhe me lëkurë që pastrohet lehtë. Ngjyrat e zeza dhe bezhë janë më praktike, ato të bardhat kërkojnë më shumë kujdes.

• Poltron prerjeje hidraulik për çdo stacion
• Pasqyrë me LED ose pasqyrë me kornizë, sipas stilit të sallonit
• Karrel ose komodinë për ngjyrat, krehërat dhe tharësen
• Prizë afër çdo stacioni për tharësen dhe piastrën

Një sallon me dy parukere punon rehat me tre stacione: dy për prerje dhe një për make up ose për klientët që presin ngjyrën. Mos i ngjeshni stacionet; rreth 1.2 metra hapësirë mes tyre është minimumi që parukerja të lëvizë lirshëm rreth klientit.

Zona e larjes

Lavatesta është pajisja që klientët e ndiejnë më shumë. Një lavateste e pakëndshme vihet re menjëherë, ndërsa një e rehatshme me masazh mbahet mend. Për një sallon të vogël mjafton një, për tre ose më shumë stacione rekomandojmë dy. Kontrolloni që lavamani të jetë qeramikë dhe rubineti të ketë dush me tub të gjatë.

• Lavateste me lavaman qeramike dhe mbështetëse qafe
• Lidhje uji të ngrohtë dhe të ftohtë dhe shkarkim në vendin ku do të vendoset
• Raft ose karrel pranë saj për shampot dhe peshqirët

Trajtimet dhe ngjyra

Nëse bëni ngjyra, trajtime keratine ose dauer, ju duhet një avullore ose një tharëse me kaskë. Avullorja shkurton kohën e ngjyrës dhe përmirëson rezultatin e trajtimeve, ndërsa kaska është e domosdoshme për dauer dhe për tharjen e flokëve me bigudina. Të dyja montohen në stativ me rrota dhe lëvizen nga stacioni në stacion.

• Avullore ose tharëse me kaskë në stativ
• Tharëse dore profesionale dhe piastra për çdo parukere
• Tas, furça dhe peshore për ngjyrat

Pritja dhe recepsioni

Pritja është përshtypja e parë. Edhe në një sallon të vogël, një banak i vogël recepsioni dhe dy tre karrige pritjeje e ndryshojnë plotësisht pamjen. Këtu mbahen edhe produktet për shitje, që janë një burim i mirë të ardhurash shtesë.

• Banak recepsioni me vend për arkën dhe për ekranin e rezervimeve
• Kolltukë ose divan pritjeje sipas hapësirës
• Ekspozitor për produktet e shitjes

Aksesorët që harrohen gjithmonë

Këto blihen zakonisht në minutën e fundit, prandaj po i shënojmë që tani: mantela prerjeje dhe ngjyre, peshqirë, kapëse, sterilizues për veglat, kosh me kapak për flokët, pasqyrë dore për t’i treguar klientit pjesën e pasme, dhe një stol me rrota për parukeren kur punon ulur. Gjeni një pjesë të mirë te aksesorët dhe produktet.

Të reja apo të përdorura?

Për poltronët dhe lavatestat, mobiljet e përdorura në gjendje të mirë janë një mënyrë e zgjuar për të ulur koston e hapjes. Për tharëset, piastrat dhe gjithçka që ka motor, këshillojmë të reja. Kemi shkruar një udhëzues të veçantë për mobiljet e reja kundrejt të përdorurave.

Sa kushton e gjitha?

Varet nga numri i stacioneve, nga lloji i mobiljeve dhe nga ajo që blini e re apo të përdorur. Mënyra më e shpejtë për të marrë një shifër reale: na dërgoni në WhatsApp hapësirën tuaj në metra katrorë dhe numrin e parukereve, dhe ju kthejmë një propozim me foto të produkteve që kemi në stok. Transport bëjmë në të gjithë Shqipërinë.